underdog永不獨行

猪拉多纳

15/10/2011
文： 黃興桂

西方足球世界有句話 — home team underdog，即係喺主場畀人睇淡或者受讓球隊，可以譯做門口狗。球場係英雄地，球隊永遠都唔認輸，喺主場受讓係恥辱。利物浦今晚於晏菲路主場對曼聯受讓，絕對唔係好似盤口咁單純，紅軍獲擁躉高唱「永遠唔會自己一個人行路」打氣，個個走多一、兩步，唔會放過曼聯。




曼聯今場可夫添上陣，但進攻重心朗尼最近受家事影響，加上喺國家隊被逐要於歐國盃決賽周停賽，心情唔多唔少會受干擾。曼聯季初有唔少主將受傷，當時派出一班小將活力十足，依家夫添上陣，一眾正選球員擔心自己位置不保，隨時踢來患得患失。為免畀曼聯進一步拋離，利物浦許勝不許敗，戰意高昂，受讓絕對捧得過！


中國隊一個失波露晒餡


另外，中國隊喺世盃外三戰一勝，只贏過級數只高過香港少少嘅新加坡，令廣大球迷失望又無奈！淨係睇番輸畀伊拉克球波，完全係由於中國隊防守時犯下腦筋上錯誤，四個後衞盯住一個前鋒，反而走甩佢個拍檔，人哋兩個前鋒搞掂你成條防線，反映中國隊後防有幾曳，冇隊形，冇組織，冇團結精神！其他問題一時講唔晒，但單從一個失球已經睇到國足衰乜。




中國新帥甘馬曹仍然重用超齡球員李瑋峰，呢位老將常常出錯，連累球隊輸波。利物浦後防同樣重用高齡球員加歷查，希望佢唔好做咗「紅軍李瑋峰」，累球隊輸波啦！


金句


唔好睇小門口狗！




獨一無二「金句王」，現職有線足球評述員，擁躉眾多。見多識廣、笑看人生，我行我素畀波風格，喺省港澳極受歡迎。