拉素遇強腳軟唔生性

猪拉多纳

16/10/2011
文： 鄭少偉

今晚意甲重頭戲，拉素對羅馬合演首都打吡，戰情肯定犀飛利！雖然首都雙雄今季表現唔多穩定，「藍鷹」拉素新簽嘅施斯同高路斯係有質素，弊在淨識得恰弱隊，即使「雌狼」羅馬喺新帥安歷基領軍下，扮巴塞隆拿效果麻麻，不過「亨利」今場信往績，撐近5次首都打吡贏晒、今場有得受讓嘅羅馬，要1.45倍「讓球客勝」！（now633台周一凌晨2:45直播）




講意大利首都打吡呢場大波前，講吓今日喺香港場大波先！我効力嘅日之泉JC晨曦，今日會喺重開嘅旺角場迎戰深水埗，早兩日我同成班隊友去睇過場又練埋波，球場外觀同入面啲設施座位又靚又舒服，樣樣都係新嘅，我班波士為咗吸引多啲球迷入場，一齊見證歷史時刻，將今場嘅波飛一律定價為廿皮，堅抵睇，大家有時間就入場支持我哋啦！


拉素入波靠晒雙箭頭


賣完廣告，講番場拉素對羅馬先！齋睇拉素嘅人腳，真係好難接受佢哋今季踢咗5場聯賽只得2勝2和1負，兩個最大牌收購施斯同高路斯已經算交到貨，可惜隊友唔多生性，對住切塞納就識贏，稍為硬淨啲嘅對手就已經有啲吃力，唔知關唔關佢哋進攻太集中喺施斯同高路斯身上呢？今場高路斯可能仲會唔踢得，點算呀？




本來，羅馬開季都唔多掂檔，教練安歷基硬要班球員學巴塞咁踢433，搞到大部分主力都牙痛咁聲，演出令人失望。須知道唔係隊隊都可以做巴塞，先唔講羅馬陣內無美斯、沙維同恩尼斯達呢啲球星，你硬要隊波放棄側重防守嘅踢法，走去踢進攻足球，結果咪令人睇到眼火爆囉！


雌狼「自由」冇托迪都掂


好在近2場安歷基開始畀球員多番啲自由度，應傳就傳應射就射，咁咪攞到2連勝囉！加上前鋒奧斯華度愈嚟愈上力，連續3場有「士哥」;拍檔保贊亦開始融入球隊，淨係呢兩個都夠殺，就算「大佬」托迪傷咗未必踢得，都一樣掂。




其實唔止數據係旺羅馬，最緊要係拉素今季仲未喺主場贏過波，又唔齊腳，咁款頭仲要讓波，唔好玩啦！一於今日下晝先去旺角場捧小弟場，夜晚再捧羅馬場！

拉素旺開大

近8戰3勝3和2負，7次開大。

近6次交手1勝5負，「大細」間住開。

羅馬半場少落後

近8戰2勝3和3負，半場只試過1次落後。

前鋒奧斯華度連續3場入波，當中2球係首名入球。