皇馬晒里冷

猪拉多纳

18/10/2011
文： 笛子波童

周三凌晨歐聯D組重頭戲，皇家馬德里主場迎戰里昂，皇馬上屆在莫連奴帶領下成功打破「里昂魔咒」，而且一班中前場球員近期狀態弗爆，勒都勒唔住。里昂作客兩連敗，演出平平無奇，波童捧「讓球主勝」。




（有線62及202台周三凌晨2時45分直播）




皇馬同里昂於歐聯可謂老對手，今次係兩軍連續第三屆碰頭，以往里昂對住「銀河艦隊」踢得特別出色，唔計上屆過去六次面對皇馬未輸過，不過皇馬上屆在莫連奴接手後扭轉局面，十六強階段以總比數四比一將對手踢出局，成功擺脫心理陰影。


里昂走樣作客連敗


和上屆次回合大勝三比○一役相比，皇馬陣容上變化不大，反而里昂有中場杜拿蘭、比真歷及前鋒施薩迪加度離隊，射手利辛度盧比斯今仗受傷亦肯定倦勤，戰鬥力進一步削弱。




莫連奴近期遇上「幸福的煩惱」，前鋒希古恩連續兩場聯賽連中三元，加埋早前國家隊賽事，十三日內三度上演帽子戲法，勁到無倫，巴西中場卡卡傷愈回歸愈戰愈勇，加上倒戈嘅賓施馬面對母會向來有好表現，莫帥賽前晒命，話個個都咁弗唔知點排陣。




里昂雖然亦有中堅克里斯、中場哥古夫傷愈復出，但佢哋對上兩場作客卡昂及聖日耳門都輸波，作客完全冇料到，面對狀態大勇嘅皇馬輸兩粒係基本消費。