曼聯強陣搶半場客W

猪拉多纳

18/10/2011


喺C組2戰2和陷入出局危機嘅曼聯，今晚作客羅馬尼亞新勢力加拉治，以朗尼為首嘅6大主力預計都會復任正選，不過紅魔鬼嚟緊周日要硬撼曼城，今仗肯定會搶攻祈求速戰速決，之後就點踢都得，1.55倍半場客勝應該穩陣。




（有線64及204周三凌晨2:45直播）


加拉治羅甲都踢唔掂


連續賽和賓菲加同巴素利，紅魔鬼的確大失預算，消息指上場聯賽鬥紅軍踢咗唔夠20分鐘嘅朗尼、拿尼同查維亞靴南迪斯，以及當日冇份披甲嘅路爾斯安達臣、路爾斯華倫西亞同尼曼查維迪今仗都會披甲。強陣出擊，曼聯對3分肯定係志在必得，但會唔會大捷就難講，始終嚟緊仲要砌死敵曼城，里奧費迪南已經話明唔會隨軍，佢哋一旦喺末段留力穩守，你真係吹佢哋唔脹。力奇估計，費Sir今仗會落柯打一開波就谷，務求盡快鎖定勝局，要開半場客W應該冇乜難度。




加拉治呢邊，小組2戰2敗反映未夠實力喺歐聯立足，最慘係佢哋個主場唔合歐聯比賽規格，今仗要移師去離開主場118英里嘅布加勒斯特國家球場迎戰，即係冇埋主場優勢。佢哋今季就連國內聯賽都踢唔掂，依家排緊喺羅甲第9位，今仗想頂住紅魔多一陣都難。