新力飛大有進步

猪拉多纳

　　有啲特定嘅賽事環境，有時真係要特別記得，好似谷草日賽、田草泥地夜賽，成日有冷門馬跑出，就算賽後亦諗唔通點解嗰批馬會爆得出，總之就係爆啦。所以，呢期全泥夜宴，各位馬友要小心嘞，唔係倒馬會米，但要搏命，等都等返沙田草地大場面啦，呢期小注玩吓咪算。

　　第三場四班1200米。「聚豪精英」上季可以連續5場跑入前三名，今季有冇咁叻仔，暫時未知？！不過，佢今季已經兩出得WQ，仍然保持一貫耐拼本色。睇番上場贏馬過程，的確係有餘未盡，直路一衝過晒，贏成接近兩個身位返嚟，締速係就係慢咗啲，贏得輕鬆嘛。今仗乘勇轉泥搵食，場地掂過碌蔗，只要呢場賽事環境有得追，講到後勁，呢匹馬唔會輸蝕畀任何對手。

　　第五場三班1200米。「新力飛」千辛萬苦上季先執到1場W，仲要係險勝匹老馬「世界波」1條馬頸，所以，自從加咗分之後，搏嚟搏去得個近字。之但係，據手足透露，暑假之後，隻馬進幅幾大，預期今季會有成績交出，至於係咪咁有「景」，跑落至知！但一睇隔晚飛，獨贏4個開，比預期熱得多，冇理由純因1檔關係，何況，上季跑過泥地夜賽而成績普通，唔應該惹飛，空穴來風是也！

　　第八場一班1200米。「大把在手」準到痺，6場田泥1200米，竟然未甩過前兩名，不愧係泥地專家。而上季尾可在此程大勝「旅英駿駒」及「聖迪達」，凸顯本身級數。如果今場唔係10檔，取勝機會好大，所以，表現好唔好，都要睇早段點搶，以及帶唔帶得出，若果順風順水則可放到。

點買法

　　襟弗嘅「聚豪精英」隔晚仍然幾好分，而「新力飛」雖熱亦未至於冇肉食，WP串射中到點都有得執吓。至於QT重心喺第五場，必然揸7膽，拖幾匹內檔馬如1/2/11，兼顧埋路程好手6。