12碼專家唔想被歸類 漢丹洛域要做新保方

猪拉多纳

20/10/2011


烏甸尼斯今季喺國內聯賽同歐霸盃同樣表現出色，唔少人將功勞歸於射手迪拿達利，但其實同樣居功至偉嘅肯定係門將漢丹洛域。呢位斯洛文尼亞國腳門將素有12碼專家之稱，不過佢話明不甘於此，希望可以成為「新保方」，做個最全面嘅超級門神。


開季6戰只失1球


上季喺意甲破紀錄6度救出12碼，兼曾做出704分鐘聯賽不失球紀錄嘅漢丹洛域，聲言討厭「12碼專家」呢個外號：「我唔想被歸類，只想做個全能門將。」事實上，呢位27歲門將又確實演出全面，球隊上仗對住阿特蘭大能夠守和0:0，全靠佢救出3個必入波，至今烏甸開季6戰只失1球，都要多得佢。




身高達6呎4吋，但同時擁有靈活身手，漢丹洛域話自己目標係追上偶像保方：「喺我心目中，保方係新世代門神嘅代表，佢係能人所不能。佢能夠好好利用雙腳協助守好大門，絕對係前無古人。」烏甸尼斯一向只要啱價，就會賣走陣中主力，早前佢哋放風話如果有球會肯出1,700萬歐元（約1.83億港元），就會放走漢丹洛域。回想04年，烏甸只係以4萬歐元（約43萬港元）將佢買入，依家一轉手，真係發過豬頭呀！