史篤城手榴彈炸散馬卡比

猪拉多纳

20/10/2011
文： 查理阿蛋

身邊有唔少朋友都唔鍾意史篤城好似美式足球咁嘅衝撞型踢法，但小妹就覺得佢哋識得善用自己長處搵食，依家仲愈踢愈好，值得欣賞！就算踢歐霸盃亦唔輸蝕，仲保持主場全勝添！今晚喺E組面對以色列球隊特拉維夫馬卡比，當然直取2.15倍「讓主」啦！




（有線64及204周五凌晨3:05直播）


地獄球場防守硬淨


史篤城嘅不列坦尼亞球場出晒名係地獄主場，每季畀佢哋用手榴彈炸死嘅球隊不計其數，今夏收購長人中鋒高治，唔止有豐富歐洲賽經驗，亦相當配合球隊嘅高空轟炸戰術。史篤城嘅防守亦相當硬淨兼有紀律，強如利物浦同車路士都咬佢哋唔入！領隊佩尼斯雖然係歐戰初哥，但就相當識得運用英超球隊身體質素上嘅優勢，面對其他較弱嘅歐洲球隊，穩守之餘入球亦唔少，喺主場炒杜安4:1已屬好例子。




至於特拉維夫馬卡比過去13次嘅歐洲賽客戰，只贏得1場咁大把，其餘12戰錄得1和11負，戰績差強人意！最慘係教頭停賽冇人督師，深入史篤城嘅地雷陣好難唔騰騰震，睇怕幾難全身而退！