洪礼贤讲马：威威多星坐二望一

猪拉多纳

　　第九场二班1200米。「威威多星」季内一出即胜，赢到对手冇得跑，去到最後200米，一拍住只「沙纸」冇耐，就以施施然姿态弹甩赢，无论取胜距离及缔速，已经够晒说服力，睇埋全程只马自己嘅表现，几可确定今季能力会比上季跨进一大步。

　　从上仗所见，「威威多星」前跟力明显好咗，亦冇咁以前难留，而入正直路打冲锋之际，踩行油都冇再「片」。既然性情、走规、跑法等，比起上季嘅佢有显着改善，如捞埋去季几场同程跑得好嘅赛事去计，推算今季或可晋身一班行列，目前喺二班唔使负重，仍会是主角。

　　第十场一班1650米。「军事行动」初出之前已曾指出，今季口劲冇咁重，亦比之前较易操控，所以，就算初出跑输咗，上赛转场仍跟多场。至於阵中跑法，较平常摆前咗，但效果仲好，话唔定系配合已转变嘅性情，连跑法亦要跟住调节埋。

　　虽然，谷草性能要博，既有「赞惑」新鲜例子在前（摩廐马如先跑几场沙田而转到谷草，上名率约5成），本身喺外地又跑过细场，而目前跑法够进取，喺谷草唔会蚀（排3档早段易泊位），有机会打叠赢。

马会赛马节目主持　洪礼贤