紅軍遇弱旅安祖卡路爾發圍

猪拉多纳

22/10/2011
文： 張志德

做職業球員信心最重要，如果承受太大壓力就肯定影響發揮，尤其係年輕球員添。利物浦中鋒安祖卡路爾身價高達3,500萬鎊，對一個廿二歲嘅後生仔嚟講，壓力真係如千斤重，希望利物浦畀佢多啲耐性，唔係就嘥咗個好球員。紅軍今晚主場對諾域治，或者就係佢發威時候。




今年一月紅軍以天價購入卡路爾，成為歷史上最高身價英格蘭球員，加上來自効力大球會嘅壓力，卡路爾要適應好難。細鬼聽唔少利記球迷講，買卡路爾真係做咗水魚，試諗諗你係卡路爾，連自己球迷都唔撐，又有乜辦法打出水準先？其實連一代射手舒利亞，都覺得呢名後生仔充滿潛力，佢實力應該被肯定，依家佢需要嘅淨係時間，而杜格利殊今季唔場場出佢，應該都係畀緊空間佢釋放壓力。


雙箭頭轟諾域治


上場鬥曼聯，杜帥又再一次收起卡路爾，細鬼覺得無可厚非。紅魔鬼實力咁勁，紅軍出單箭頭同對手搶中場好正路，但今場對手只係諾域治，杜帥應該打番雙箭頭，搵蘇亞雷斯搭卡路爾，再出埋古積特去支援，全力㩒住對手嚟攻。利物浦主場有威力，有力贏對手兩粒，捧「讓球主勝」。（有線200及300台周日凌晨零時30分直播）


張志德


本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。