紅軍生擒金絲雀

猪拉多纳

22/10/2011
文： 走肖

等人打救，不如自己爭氣，利物浦今晚喺英超主場對「金絲雀」諾域治，一於捧1.65倍「讓球主勝」。講真紅軍今季表現唔算搶眼，特別係領隊杜格利殊用3,000萬鎊收購嘅安祖卡路爾最唔掂，日前對格拉斯哥流浪嘅熱身賽，佢嘅表現更加被傳媒狂插，唔想入雪櫃當然要踢爭氣波自救。（有線200及300、廣東體育周日凌晨0:30直播）




曾經見過有本書叫《生氣不如爭氣》，又係嘅，面對批評同質疑，嬲都冇用，用行動代表語言反擊最實際。由於安祖卡路爾發揮唔到預期中威力，熱身賽對流浪又被盯死，據聞杜格利殊打算趁1月轉會市場重開，再簽新右翼幫手斬波，希望幫到安祖卡路爾發揮空中優勢，目的係證明自己冇入錯貨。


今季入得1粒唔敢Hea


正因為咁，就算安祖卡路爾唔介意自己今季得1個入球，佢老頂杜格利殊照計都唔會容許佢Hea踢，肯定會諗辦法幫佢入波，加上「神奇隊長」謝拉特上星期踢番正選即射破曼聯大門，咁好腳頭，相信紅軍唔會放過主場省招牌好機會，如果唔係，今季再入唔到前4名就弊傢伙。




諾域治遇強腳軟




對家諾域治以英冠亞軍身份升班後，表現對辦，問題係佢哋對住車路士同曼聯都係輸波收場，而且至少淨輸2球，睇得出對住名牌強隊，冇咩計仔搶分。更何況諾域治前鋒史堤芬摩利臣同荷拉漢卡士有限，前線幾乎靠晒翼鋒安東尼派京頓入波，就算紅軍有中場盧卡斯停賽，要盯死佢依然話咁易，呢場想諾域治破蛋都有難度，慘敗唔出奇。


橫數千軍


紅軍半場4場不失

‧對上4場正式賽事半場不失，2次領先、2次打和。

‧連盃賽跨季近16場主場有10勝5和1負。

諾域治旺開大

‧最近7場有5次開入球大、2次開入球細。

‧近4次對賽全敗得2個入球。