曼市二次大戰爆發

猪拉多纳

23/10/2011
文： 樂比堅尼

今晚英超上演曼徹斯特市打吡大戰，曼聯主場對曼城。兩軍季初銳不可當，平均入球喺3球以上，單憑一隊之力已有力開大盤，加上兩軍牙齒印極深，希望置對方於死地，踢法上肯定充滿激情及血性，今場入波必多，1.78倍嘅大盤不容錯過，曼聯讓平半，樂比仔亦睇好上盤。




（有線200及300台周日晚8時30分直播）


Round1社區盾入5球


先講點解捧入球大，曼聯同曼城係英超入波最多嘅球隊，正如之前所講，兩隊聯賽平均入球係3.38球同3.13球，加上曼聯近六次主場對曼城有五次開大，開細嗰次半場已有兩粒，另外季初舉行嘅社區盾，曼聯同曼城合力炮製五個入球，單憑呢幾個數據，今場大盤有1.78倍已相當吸引。


曼聯小讓平半秤先


除咗大盤，樂比仔亦覺得曼聯讓平半相當吸引，因為曼城過往三十二次作客奧脫福，只係贏過一次咁大把，故捧上盤基本上係半個盤博一個盤，值博率極高，而且曼城今季畀人捧到上天，但講到尾佢哋仲未遇過真正嘅強手，今季連英超Big4都未贏過，就話想挑戰聯賽冠軍？似乎諗得太早喎，睇佢哋踢歐聯嘅表現，都係不外如是啫！




總括而言，曼城無論領隊功力、團結精神、合作性同曼聯仍有一段距離，唯一可取之處就係飢渴感，但呢個優點不足以令佢哋創造歷史，今場一於捧曼聯及大盤啦！


紅魔英超攞晒彩


總計聯賽及所有盃賽，曼聯近10次面對曼城取得7勝1和2負較佳成績，其中兩次輸波都係喺盃賽，換句話講，曼聯近3季聯賽都未輸過畀對手，不過5次贏波之中有4次都係僅勝對手一球，戰情唔算一面倒。曼城對上一次於聯賽擊敗曼聯係07/08球季，當時曼城主客兩循環都擊敗曼聯，盡掃多年鬱悶。