馬主論戰

猪拉多纳

福智級數唔簡單

　　今日谷草日賽，相信好多人會吼實方嘉柏啲馬，但我反而睇好告東尼有馬贏，甚至起孖。推介第九場「風之子」，上場跑沙田志在熱身，月中試泥閘一放到底，狀態操起咗，依家體重更降番落去上季贏馬水平，轉嚟谷草要吼實。

　　另外鍾意尾場「福智」，上場跑贏「醒目精英」、「曬冷王」，後駒再出已捧走婦女銀袋，反映賽事水準夠晒高。轉嚟谷草上陣，佔級數之利，隨時再贏。

張敬山

郭立基再來旺財

　　繼對上一次起孖兼捧盃之後，剛戰郭立基又贏「兵奇臨」，搏殺手風真係好順，一於吼實佢啲馬。推介第四場「再來旺財」，季內初出嗰場即跑第三，證明有狀態，上場全程留後輸咗唔使理，今場如果肯擺前走有權變身。

　　另外鍾意第二場「金滿貫」，季內初出即入Q，表現唔曳；上季試過響谷草一哩輸少少跑第二，證明場地啱發揮，今次轉場上陣唔似陪跑咁簡單。

任達華

伽羅縮程咪睇小

　　大摩今季改行精兵制，雖然每期出馬少，但成績並唔曳，剛戰就憑「讚惑」食尾胡。今日大摩出五駒，我睇會有頭馬見面，鍾意第九場「伽羅」，上季轉投摩廐後三戰得一冠一季，表現有進步，今次季內初出縮程跑1200米唔嫌短，有得諗。

　　尾場大摩出兩隻，我比較鍾意「軍事行動」，上場響泥地贏得好輕鬆，五歲馬已完全適應水土，轉跑谷草卡士勝對手一籌，要再贏冇難度。

寇鴻萍、梁廷鏘