阿仙奴半勝屠城

猪拉多纳

23/10/2011
文： 樂比堅尼

今晚英超大戰連場，與曼徹斯特打吡同時間舉行嘅阿仙奴主場對史篤城，相信會好多人忽視，但根據經驗，呢啲冇乜人留意嘅賽事，反而會開出正路不過嘅戰果，令好多人大嘆走寶，樂比仔認為今場不妨揀番正路嘅阿仙奴，主W有1.46倍回報已算不俗，進取啲可捧埋2倍阿仙奴半場勝。




（有線201及301台周日晚8時30分直播）




阿仙奴今時今日嘅水平，確實今非昔比，但面對中下游球隊仍然係綽綽有餘，尤其係球隊經過連番打擊及洗禮後，已重新認清自己嘅定位，聯賽只係踢咗八周，兵工廠今季嘅前途仍未完全絕望。




事實上，阿仙奴主場已連贏五場，可見佢哋主場仍相當穩陣，自史篤城升上英超後，三次作客酋長球場全敗，而且都係半場就落後，以史篤城防線嘅速度，真係好難守得住禾確特、尹佩斯等高速嘅球員，當年史篤城後衞梳爾哥斯踢斷阿仙奴中場艾朗藍斯隻腳，呢個仇仲未報，何況尋日仲係雲格生日，點都要贏波沖喜啦！


史篤城歐霸盃後遺症


講番史篤城，其實佢哋仲有一大隱憂，就係歐霸盃後遺症，樂比仔一向覺得歐霸後遺症遠遠嚴重過歐聯後遺症，原因係歐霸周四晚舉行，球員休息時間唔夠，另外踢歐霸嘅都係細球會，兵源冇歐聯球隊咁充足，史篤城對上兩次踢完歐霸分組賽，分別大敗畀新特蘭○比四及輸畀升班馬史雲斯○比二，睇怕今場都凶多吉少！