桑坦德亂晒坑聽歸「西」

猪拉多纳

25/10/2011
文： 力奇

連「最強」巴塞都唔怕，西維爾今晚喺西甲快車主場對「聯賽最弱」嘅桑坦德，要大開殺戒有幾難？要知道桑坦德踢咗8輪聯賽仲未開齋，當中更有6場連波都入唔到，領隊古柏搞到班波亂晒坑，今晚造訪西維爾同等死冇分別，2.12倍「讓球主勝」值捧！（now632及660台周三凌晨4:00直播）




西維爾上仗悶和巴塞搶得1分，士氣肯定大幅提升。當中力奇最欣賞係鐵漢加利美度，呢位智利防中助攻助守，表現勁Sharp醒，有佢孭飛，條中場線勁靠得住。係，西維爾今戰有馬里射手簡路迪坐波監，不過鬥牛前鋒尼格度及時傷愈復出，鋒力基本上冇乜影響。




桑坦德開季表現真係衰到冇朋友，計埋季前賽到依家，踢咗16場波先得1勝，球員狀態同信心都處於低谷。領隊古柏今季接手領軍，就話要班波踢緊迫性踢法，但限於球員質素同體能，根本做唔到教練要求，搞到亂晒坑。最慘係佢哋今戰仲有中場重心哥沙同巴基斯奧古養傷，連創造力都冇埋，想偷雞都難。