巴塞球王誓吐烏氣 搵格蘭納達祭旗

猪拉多纳

25/10/2011
文： 亨格比利

西甲快車之夜由巴塞隆拿做主角，「地上最強」剛啱失分畀西維爾，新季西甲首次食白果，榜首位置又冇埋，呢鋪唔搵CF格蘭納達出氣搵邊個？已經連輸4個亞洲盤嘅巴塞應該退咁啲熱，照牌面睇係時候反彈，今鋪造訪人腳唔齊兼鋒力薄弱嘅格蘭納達，讓到「-2」照捧2.02倍「讓球客勝」。（now632及660台、廣東體育周三凌晨2:00直播）


法比仔簡路迪Friend番


巴塞喺周日凌晨同西維爾互交白卷，比賽末段法比加斯仲涉嫌種族歧視引發群毆，之不過據西班牙《阿斯報》透露，法比仔已經透過Twitter否認指控，仲打咗個電話畀西維爾前鋒簡路迪澄清單嘢，家陣佢兩個已經Friend番，法比仔表示唔會理埋啲無謂嘢，專心備戰格蘭納達最實際。




賽前《馬卡報》報道，巴塞中堅碧基已經復操，但為咗穩陣起見，今仗多數同佩奧爾一齊缺陣，周末對馬略卡場波先會候命，意味住馬斯真蘭奴將會再一次客串中堅。係，佢哋條防線係唔齊腳，不過門將域陀華迪斯已經連續619分鐘冇失過波，況且格蘭納達係西甲火力最削球隊，8戰過後僅入2球，今晚仲要有兩大中場主將耶巴達同卡路士馬田斯因右腳肌肉受傷缺陣，想搵巴塞着數？冇咁易！


巴塞將帥全民撐美斯


最重要係被譽為球王嘅美斯，近2戰食白果之餘，去仗仲要射失埋12碼，同時死敵C朗就大演帽子戲法，球王威名蕩然無存，今鋪再唔打爭氣波，隨時王位不保！況且巴塞將帥日前都走出嚟開腔，實行「全民撐美斯」（見另文），有班咁有質素又咁好嘅隊友，球王今鋪唔發威就勢係假啦！　




睇番近期戰績，巴塞已連續輸咗4個亞洲盤（見附表），聚飛情況應該冇之前咁誇張，適逢今戰柏度洛迪古斯同布斯基斯齊齊重返正選行列，上仗12碼宴客嘅美斯又想將功補過，睇怕格蘭納達聽抬蛋都得咯！


橫數千軍


格蘭納達開季僅入2粒

‧西甲鋒力最弱隊伍，開咧8戰入得2球。

‧今季出戰西甲未試過喺上半場入波。

巴塞華迪斯619分鐘不失球

‧今季西甲8戰有6場保持清白之身。

‧域陀華迪斯保持619分鐘不失球紀錄。