曼城 紅軍 奪命金

猪拉多纳

26/10/2011
文： 蘇豪

今晚繼續上演英格蘭聯賽盃十六強戰，兩場重頭戲係史篤城主場對利物浦，及狼隊主場對曼城。曼城兵力過盛，就算收起阿古路及大衞施華等球星，預計今場正選陣容身價仍達10億；紅軍冇咁多星，但盃仔場合仍有佐敦軒達臣及安祖卡路爾等貴價後備孭飛，加埋場場上陣搏殺嘅蘇亞雷斯，正選陣容點計都有7億。曼利兩軍加埋17億「奪命金」，今晚足以K.O.狼隊及史篤城！




曼城後備力量強勁，今次就算畀部分主將休戰，作客仍然有力延續強勢大炒狼隊，捧大盤！




（now 639周四凌晨2時45分直播）




曼城上場以六比一大炒曼聯盡顯霸氣，最終能否成為英超冠軍言之尚早，但依家個勢肯定超勁。曼城球星如雲，連拿斯尼及阿當莊臣等優質中場都非必然正選，前線阿古路、巴洛迪利及迪斯高個個弗到震，中前場調動空間大。經過上場硬仗後，主帥文仙尼應會收起部分主力，但高拉洛夫及尼祖迪莊等副選仍然極具分量。


狼隊衰到貼地


曼城富豪老細文梳亞好大喜功，文仙尼深明呢一點，就算連盃仔都唔會放過，今場即使安排主力休戰，亦唔會求其砌個殘陣，大家唔需要太擔心。現時曼城隊內競爭大，個個都要爭位，高路托尼解禁後上陣機會唔多，夏格維斯亦要喺盃賽顯示身價，文仙尼至少有兩套陣容應付聯賽及盃賽，唔怕搏殘班兵，認真幸福。




狼隊上季曾於主場戰勝曼城，但今時唔同往日，近七場聯賽二和五負衰到貼地，而曼城則已成英超頂級勁旅，仲要踢到順晒，就算作客都可控制戰局。曼城四連勝轟入十六球，火力超強，狼隊後防唔穩，隨時兵敗如山倒，捧大啦！