紅軍恨贏史篤城

猪拉多纳

26/10/2011
文： 樂比堅尼

史篤城堪稱巨人殺手，今季聯賽先後令曼聯、車路士及今仗對手利物浦吃盡苦頭，理論上主場受讓相當抵玩，但正所謂便宜莫貪，聯賽同聯賽盃一字之差，卻完全係兩回事，兩軍心態完全唔同，樂比仔認為紅軍今仗有力發圍，捧客W。




（now 638周四凌晨2時45分直播）




聯賽盃揀波最重要守則，就係睇吓隊波有幾大興趣爭標先，一般情況而言，強隊應付多條戰線好唔得閒，多數派後備落場；護級球隊則自身難保，宜得一早出局，故揀一啲具實力嘅中游球隊通常都唔會點衰。利物浦係英超唔使踢歐洲賽球隊中，牌面上實力最強一隊，所以樂比仔幾睇好紅軍今季踢聯賽盃前景！


史篤城後備輸戰意


事實上，利物浦今場最大優勢就係史篤城最大隱憂地方，史篤城今季要分心應付歐霸，對呢支兵力唔算充足球隊嚟講相當吃力，睇番史篤城今季踢完三場歐霸分組賽後，返到聯賽全部輸波，就知道歐霸盃對佢哋嚟講係相當大負擔。




利物浦情況唔同，佢哋今季目標除咗喺聯賽爭取前列位置，亦希望喺足總盃同聯賽盃爭取到好成績，畢竟領隊杜格利殊係傳統英式領隊，對本土盃賽仍有一份情意結，佢接掌紅軍後成績冇顯著進步，自然希望可以喺盃賽揚威。




睇番兩軍晉級過程，紅軍分別作客擊敗白禮頓及埃克塞特，而且兩仗陣容都頗強，射手蘇亞雷斯都有落場，反觀史篤城則派較多後備。利物浦畢竟係英聯盃奪標次數最多球隊，加上咁多年冇捧過盃，絕對唔會放過今次機會！