車仔掃拖肥補祝阿布生日

猪拉多纳

26/10/2011
文： 樂比堅尼

另一場英聯盃十六強上演「雙藍會」，愛華頓主場對車路士。兩軍十日前至交手，當時車仔主場輕取三比一，今次主客互調，但樂比仔認為優勢仍喺車仔一方，畢竟車仔愈踢愈順，而愛華頓則持續低迷，車仔今仗必贏波補祝班主阿布拉莫域生日，捧客勝。（周四凌晨3時開賽）




車路士上仗聯賽有保辛華及杜奧巴領紅牌出場，搞到大部分時間九人應戰下，以○比一不敵昆士柏流浪，雖然車仔輸波，但成班球員並冇洩氣，因為呢場波出現咗多個對車路士不利嘅判決，而且車仔踢少兩個依然表現甚佳，差啲扳平甚至反勝，所以球員谷埋嗰團火，隨時會喺今仗爆發！


愛華頓跌Watt


車仔今仗有杜奧巴及保辛華停賽，但近期腳風甚順嘅費蘭度托利斯復出，人腳依然非常強勁，領隊保亞斯之前曾經講過，只有不斷奪標先會令老闆阿布拉莫域滿意，所以無論係大盃或盃仔都好，保亞斯絕對唔會放過，尤其係阿布剛於兩日前先生日，上仗不幸輸波，今仗正好係慶祝補償好機會，面對今季大跌Watt嘅愛華頓，相信車仔可贏波反彈！