皇馬反潛再開殺戒

猪拉多纳

26/10/2011
文： 法比加輝

西甲今周亦安排快車賽程，狀態弗到漏嘅皇家馬德里主場迎戰維拉利爾。「艦隊」近期順風順水，對上6場賽事贏晒之餘，最瘋狂係共攻入25球，平均每場4粒有找，攻力極具保證。適逢客隊「黃色潛艇」正在「潛水」，個個球員狀態沉到冇影，教練加列度已經吊緊鹽水，皇馬隨時大炒送佢一程，中位數3.5球照捧大盤。




（now 632及660周四凌晨4時直播）


C朗唔獨食威力仲勁


皇馬近期可謂銳不可當，連埋歐聯在內近6場全勝，最重要係中前場球員輪住爆發，希古恩與賓施馬鬥爭「士哥」去保正選位置，而基斯坦奴朗拿度就放低一貫獨食踢法，肯多啲為隊友鋪橋搭路，令「銀河艦隊」進攻更多元化。




另一利好因素係皇馬「十字兵」唔多，只得卡維奴及紐尼沙軒仍在養傷，其餘主力全部踢得，包括剛傷愈嘅艾比奧爾在內，雖說賽前有消息指「寸王」莫連奴有意讓頻頻征戰嘅沙比阿朗素休息，不過對整體戰力影響輕微。


加列度聞到魷魚香


客軍維拉利爾今季狀態持續低沉，近6場比賽未嘗一勝之餘，周日剛遭「神奇球隊」利雲特大炒3粒，無論士氣同信心都跌到最低點，唔少西班牙傳媒估計教練加列度已聞到魷魚香，今仗再輸，「潛艇」帥印勢必難保。然而以維拉利爾目前嘅狀態到訪巴拿貝球場，睇怕都係凶多吉少，弗爆嘅「艦隊」大炒味濃，今場一於捧入球大，另「讓球主勝」亦值得跟進。