拜仁博反彈「-2」熱食

猪拉多纳

26/10/2011
文： 翁文成

連續13場不敗走勢告終，德甲班霸拜仁慕尼黑想搵人祭旗出番啖氣？今晚就有機會嘞！佢哋喺德國盃次圈主場迎戰恩高斯達特，呢隊茄喱啡連德乙都踢唔掂，佢哋去到安聯球場會仲唔輸到懵？拜仁讓「-2」，1.48倍「讓球主勝」趁熱食。（無綫翡翠台周四凌晨2:30直播）




拜仁上周日輸畀漢諾威，錄得今季德甲第2場敗仗，查實呢個世界邊有長勝之師㗎，況且漢諾威主場出名勁，拜仁輸波都唔係咩大冷門啫。小弟認為拜仁輸波反而令佢哋包袱輕咗，今晚對住乙組仔恩高斯達特就正正係重新起飛嘅良機。


恩高斯達特乙組都踢唔掂


賽前拜仁主帥軒歷基斯講明派部分副選出擊，意味住泰摩斯卓克、奧歷同尼斯彼德臣都會披甲，不過卡士依然比對手高幾班，畢竟恩高斯達特聯賽已經連輸4場，啱啱喺榜尾大戰輸畀亞琛1:3之後更加爆出內訌，教練穆亞文就彈防線唔掂兼球員缺乏自信，體育總監加特拿就公開踩穆亞文戰術過時，籠裏雞作反睇怕都要吞蛋。