巴勒莫「主勝」斬瓜「切」菜

猪拉多纳

27/10/2011
文： 力奇

經歷2連敗嘅巴勒莫今晚返到主場福地，迎戰近況低沉嘅萊切，絕對係爭取反彈好時機，事關佢哋今季喺主場3戰全勝，氣勢勁爆。與此同時，佢哋今仗仲要有後防主力錫圖傷愈復出，加埋主帥文基亞個「4312」新陣式有料到，絕對有力大捷，2.4倍「讓球主勝」值得捧場。（開賽時間：周五凌晨2:45）




「傻豹」開季7戰得3勝1和3負，戰績不過不失排第8，不過近排接連不敵AC同羅馬，教練文基亞絕對需要今場勝仗振奮軍心。好彩嘅係，佢哋今季喺主場踢得格外出色，3戰全捷仲要連國米都係手下敗將，佔地利可以打高幾班波。


萊切領先3球輸波散晒


人腳方面，阿根廷守將錫圖傷愈，本來移咗落嚟嘅米利亞斯奧可以復任擅長嘅防中位置，再加上前線又有米高利重返正選陣容，火力自然可以加倍提升。文基亞上仗幫球隊由「442」改為「4312」陣式，雖然輸咗畀羅馬0:1，但全場攻門較主隊更多兼更具威脅，輸波乃非戰之罪，據聞連佢哋個麻煩會長森柏連尼都讚好，今仗係時候交功課啦！




至於客軍萊切開季7戰只得1勝，近5戰仲要只得1和4負。最激氣係上仗主場對住AC，竟然夠膽死半場領先3:0，最後倒輸3:4，對軍心同士氣肯定會帶來重大打擊，今仗仲點樣翻身？