洪禮賢講馬：韋達頭馬賠率有「進步」

猪拉多纳

　　韋達目前累積15場頭馬，比對上季同期，頭馬數字係一樣，而單日贏多過1場嘅次數亦然（4次），不過，佢上季只曾1次單日四捷，但今季只係跑咗兩個月，已經喺田谷草地賽期各有1期贏4W，係咪有進步？真係好難講，因為唔知佢之後仲有冇咁嘅佳作。

　　不過，如果比較上季和今季同期頭馬賠率，韋達真係有幾大「進步」，睇番上季頭兩個月15場頭馬，4倍或以上分別有「中華寶寶」、「好旺寶」、「開心好多」及「一路順風」，而今季則增加至8隻W，最好分嘅頭馬，暫時係剛周三夜賽17倍嘅「樂融融」。

　　其實，從上季韋達頭馬賠率分布，已經比再之前幾季叻咗，唔係件件熱食，起碼贏過幾匹冷門，如30倍「友瑩果」、24倍「太陽海岸」及「心中有程」、19倍「富貴金龍」等等。

冷門坐騎唔係輸梗

　　實在韋達前季100W之中，原來僅得3匹賠率喺10倍或以上，所以，佢啲冷馬，再唔係同輸梗成等號。

　　今期沙田賽事佢騎足11場，有「XX繽紛」、「新希望」撐住，睇牌面，斷唔會好似周三柏寶啩？！

　　至於，大眾焦點所在，梗係未輸過嘅「XX繽紛」，希望隻馬可以完成9連捷，延續不敗神話，殺到去國際賽。

馬會賽馬節目主持　洪禮賢