洪禮賢講馬：牛精大師隨時放到

猪拉多纳

　　第十場二級賽1600米。「締造美麗」初出1400米得季軍，演出已算水準之上，因賽前兩大閘表現未覺銳，暑後狀態唔係一操即起，嚴格嚟講，進度頂多8成，而落場跑既要負133磅，前兩段又跟快咗情況之下，拉士仲保到個P，明顯係級數搭夠。

　　雖然，今次賽前大閘仍然唔討好，末段仲係幾「立」，迫落去嘅反應差多少，好在已跑過1場，估計對提升狀態有一定程度作用；除非今場出現意想不到賽事形勢，如正常推測呢場嘅前中段唔應該會快，「締造美麗」有機會順跟兼賺埋形勢，就算贏唔到，要捱一席位置夠晒資格。

　　第十一場二班1400米。「牛精大師」初出田草1200米得第五名，無疑，沿路走在有利嘅外叠，冇想像中咁蝕（頭馬「金鎸龍華」大半途程喺佢後面），不過，話晒全程佢係冇遮擋又三叠，但末段冇畀前四名拋甩，纏鬥力及韌力唔錯。而佢喺外地少跑中程，會唔會莫氣唔知，不過，由於未嚟香港前，跑法傾向前置，撞正今場未必有步速，加上，12檔如果早段唔積極就老襯！預料巫斯義可能會比上賽更有意識喺早段搶，至於，帶唔帶到返嚟，就真係要視乎形勢及本身氣量嘞，但如果有賠率，可一博。

馬會賽馬節目主持　洪禮賢