紅魔變陣仲易甩「拖」

猪拉多纳

29/10/2011
文： 郭球奇

上周經歷世紀大敗嘅曼聯，雖然啱啱周中成功反彈，但今晚返番英超作客「拖肥糖」愛華頓，隨時又失分都唔奇。皆因有傳領隊費格遜今場會收起4名主力以作懲罰，再睇埋近年到訪葛迪遜公園球場冇啖好食，愛華頓2.05倍「讓主」值得一試！




（有線201及301、廣東體育周六晚7:00直播）




曼聯上周喺「曼市打吡」以1:6慘敗畀死敵曼城，真係睇到球奇呆咗。雖然紅魔喺啱啱周中聯賽盃以3:0輕取艾迪索特晉級，但對手畢竟只係隊英乙波，根本唔足以反映曼聯班球員已經搵番信心同士氣。


後防大變收起里奧 艾拉


更何況曼聯領隊費格遜仲未嬲完班球員，據英國《每日鏡報》爆料，費Sir因不滿里奧費迪南同艾拉兩位老將，喺打吡戰未能起到帶頭作用，決定罰佢哋今場內部停賽，改由菲爾鍾斯拍尼曼查維迪扼守中路，法比奧達施華打左閘；路爾斯安達臣同費查就會讓位畀湯卡華利同卡域克，以示懲戒。雖則話曼聯一向以整體踢法見稱，但霎時冇咗4名主力，唔多唔少削弱咗組織默契。


近3次作客愛華頓不勝


對家愛華頓近期表現回勇，繼作客贏富咸後，周中聯賽盃打至加時先不敵車路士出局，當中前鋒沙夏仲連續2場有波入，預計今場又有奧士文、希拔、史密斯高文同侯活4大主力復任正選，有力同曼聯一拚。事實上，曼聯自07年9月後，再未喺葛迪遜公園球場贏過波，近3次只得2和1負，今晚仲要突然大變陣，想食「糖」隨時骾親！


愛華頓主場鬥曼聯五五波


日期 戰果

10/09/11 愛華頓 3:3 曼聯

10/02/20 愛華頓 3:1 曼聯

08/10/25 愛華頓 1:1 曼聯

07/09/15 愛華頓 0:1 曼聯

日期 戰果

07/04/28 愛華頓 2:4 曼聯

05/08/13 愛華頓 0:2 曼聯

05/04/20 愛華頓 1:0 曼聯

橫數千軍

拖肥糖後勁凌厲

‧目前10個英超入波，有4球嚟自90分鐘後。

‧近15次主場獲8勝5和2負。

紅魔鬼後防唔穩

‧近13場英超賽事，只得3場冇失波。

‧近8場英超作客獲3勝4和1負。