AC羅馬Goal手「大」作戰

猪拉多纳

29/10/2011
文： 鄭少偉

羅馬同AC米蘭今晚交鋒，上演意甲重頭戲！AC表現回勇，全靠伊巴謙莫域、奇雲保定同洛斯連奴撐起隊波，對手羅馬亦崇尚喪攻433，Goal手鬥法，梗係支持1.92倍入球大啦！（now633台周日凌晨0:00直播）




羅馬同AC開季都有唔少主力受傷同冇態，搞到開咧成績唔理想。好彩AC近4戰全勝重返勝軌，一對經常轉會、又唔多起眼嘅中前場球員：奇雲保定同洛斯連奴實在係應記一功。咪睇呢兩位仁兄都試過連中三元助AC贏波，好似好威咁，查實佢哋嘅職業生涯都唔多順利o架！


紅黑兵3大人球齊爆發


先講洛斯連奴，佢喺祖雲達斯青年軍出身，10年踢過9間球會（同我有得揮，哈哈！），好彩佢轉投AC後爆發，唔止助攻助守，仲入足4粒波添！至於24歲嘅保定，除咗西甲，佢原來其餘3大聯賽都踢勻！前仗保定終於嚟料，後備上陣大演帽子戲法，證明冇入錯貨！講到人球，又點可以唔提伊巴謙吖！呢位瑞典射手嘅級數唔使多講，離開巴塞後，伊巴謙嘅狀態穩定咗好多，開季至今入5球，以佢嘅狀態，入波易如反掌啦！


雌狼鋒線3將都有卡士


之不過，對家羅馬亦唔係毫無還擊之力，「王子」托迪養緊傷期間，中場仲有迪羅斯、柏路達同新星拉美拿頂住，創造力同活力都係有增無減。咪忘記鋒線仲有保贊、新星波連尼同「意甲標王」奧斯華度孭飛，鋒力拍得住「紅黑兵團」架，既然兩軍都有咁多入球高手，咁梗係簡簡單單捧入球大啦！


橫數千軍


羅馬連開3口單




‧近8戰3勝，連續3場開單。

‧近6次主場交手獲2勝4和。

AC近4戰勁入13球

‧近8戰6勝，對上4場入13球。

‧中場奇雲保定近3場勁入4球。