歡送教頭！鹿角爆破紅鑽

猪拉多纳

29/10/2011
文： 走肖

第19屆日聯盃決賽今日喺國立競技場上演，紅鑽同鹿角對撼，鹿角教練奧利華拉打算締造「15冠」紀錄光榮告別，作為創會20周年禮物，讓得起紅鑽平半！




（開賽時間：周六中午12:05）




奧利華拉喺09年帶領鹿角完成日職3連霸，可惜近2季鹿角跌Watt，各項收入又被東日本地震拖累，估計今季虧損超過1億日圓，據聞奧利華拉諗住拎埋日聯盃就辭職，咁樣可以令鹿角創會20周年締造日職、日皇盃、日聯盃總數「15冠」新紀錄，又有1億日圓冠軍獎金做告別禮，走得夠晒體面。


連續兩日閉門操練


正因為咁，向來操練任睇嘅鹿角，日前破天荒連續兩日拒絕傳媒採訪，廢事洩露爭標策略，當正呢場係榮辱大戰。仲有，鹿角隊長小笠原滿男都話要將冠軍送畀東日本地震災民，戰意爆晒燈。


紅鑽換教練亂陣腳


鹿角有中堅岩政大樹受傷，但對家紅鑽聞到降班味，上星期怒炒施里積高柏杜域，改由青年軍教練堀孝史頂上，根本唔夠料同奧利華拉鍊。今場紅鑽嘅賽前部署同臨場調動，難免蝕章，加上射手田中達也同中場馬斯奧李察迪斯打柴，受讓都要唔過。


日聯盃決賽賽制：


決賽以一場決勝負，若90分鐘內平手即加時。（上、下半場各15分鐘）。假如加時仍未能分出高下，則互射12碼決定冠軍。