超皇鷹睇準撲擊

猪拉多纳

　　今日有4項盃賽，戲肉當然係兩場級際賽，大摩馬房空群而出，擺到明想攞晒兩隻盃，至於佢有冇咁叻？話晒係盃王，點會冇機會！講開呢個馬房，馬房手足透露，今日係摩廐大搏殺日子，唔止大盃嗰兩場，其他場次亦「浸」咗唔少重兵，記得嘜實佢啲馬。

　　第五場四班1400米。「勁賽王」一出即勝，有幾勁，已經睇到六七成，坦白講，上場係就係贏得易，但臨場見隻馬，其實未收好身．亦有啲脾氣，而比賽時仍然嫩水，咁都贏3個幾身位返嚟，超唔到兩班邊有咁輕鬆。依家仲留喺四班，着數到暈，只要加程及重磅唔係太大問題，冇令到佢跑唔出水準，對住呢批馬，真係高晒。

　　第八場三班1200米。「紅旗勇將」初出贏谷草1200米，末段唔覺用咗好多力，感覺上係睇住對手嚟食。今仗轉戰田草，場地冇影響，雖然仍要負重磅，睇真啲，對手多為三班中下級之馬，將會遇到嘅威脅少之又少，爭取連捷嘅機會幾大。

　　第十一場二班1400米。「超皇鷹」連續兩場輸得接近，係咪實力得咁上下？阿棟唔係好信，當然，如果立心等落班就冇得好講，不過，白德民一直唔放手，超磅都要騎，其實幾正面。另外，睇佢近兩仗發揮，試馬味濃，估計嚟到季內第3仗，出擊時間已到，希望呢場早段步速扯得快，呢匹後勁好強嘅馬，就有機一顯身手。

點買法

　　話咗大摩有手影，梗係以佢啲馬串射，「紅旗勇將」搭「超皇鷹」呢條2x3W賠率幾好，呢注真係唔慳得。而QT重心喺第五場，因為「勁賽王」太熱，啲腳刻意揀冷嘢，腳拖３　４　７　１２。

資深評馬人　陳華棟