漢堡凱沙齊獻細

猪拉多纳

30/10/2011
文： 蘇斯黑柴

德甲壓軸戲漢堡主場對凱沙羅頓，漢堡搵咗新帥芬克上任後成績算有起色，不過近期噩耗頻傳，既要減薪又有攻擊主力因傷缺陣，士氣大受打擊，今晚遇上守強攻弱嘅凱沙羅頓都未必咬得入，黑柴推介2倍入球細。




（有線61及201台周一凌晨零時30分直播）


漢堡財困公布減薪


漢堡近期成績同演出都只能夠講稍有起色，但正當芬克準備全力為球隊救亡嘅時候，竟然不斷收到壞消息，首先係會方受到財困壓力，決定向球員開刀，已經公布要削減25%球員薪金支出，預期要賣走高薪球員，留低嘅亦要減薪，對士氣肯定構成打擊，跟住係兩名攻擊主力受傷，首席射手柏歷同中場指揮官伊利斯域今仗都唔踢得，鋒力嚴重受損。漢堡上周中喺德國盃雖然輪換大部分主力，但面對第四級聯賽球隊基拿都要苦戰百二分鐘至險勝，全場演出乏善足陳，今晚雖然主場出擊，要爭勝同爭取入球依然未許樂觀。


凱沙德國盃冇留力


客軍凱沙羅頓今季放走多名攻擊主力，攻力大減，至今踢咗十場聯賽只入八球，好在防線唔算差，失球只有十三個，啱啱同會方續約嘅教練古斯喺限米煮限飯下焗踢保守足球，奇怪嘅係冇因此而專注護級，上周中德國盃作客對法蘭克福，佢哋派出全部主力，搏足百二分鐘至過關，休息時間仲要少漢堡一日，今晚體力方面明顯輸蝕，作客打硬仗當然以守為先，預期今仗入波唔慌多。