帕爾馬識留放至高招

猪拉多纳

30/10/2011
文： Mic少

球隊留力應付「更重要」賽事，是否違反體育精神，甚至要被處罰，一直備受爭議。Mic少認為其實呢種所謂嘅「留力」，並非甚麼有違道德嘅事，反而係盡最大努力爭取佳績至真。畢竟唔係所有球隊都可以好似曼城咁富貴，能夠擁有兩套頂級正選陣容，尤其細球會資源非常有限，更加要揀波踢，捨難取易提升取分機會，咁先至係上策，亦係一種戰術。


上仗對AC慳番啖氣


意甲球隊帕爾馬上周中大敗喺AC米蘭腳下，意國傳媒質疑教練哥隆巴故意排弱陣，佢亦承認有所保留。原來好簡單，既然明知唔夠AC砌，倒不如慳番啖氣，爭取喺今晚主場擊退護級對手切塞納，對球隊長遠利益更有好處。哥隆巴寧願受千夫所指，都要採取「留力戰術」，可見佢決心非常大，睇嚟帕爾馬今場不勝無歸。




（周日晚10時開賽）