喜鵲金身唔怕篤

猪拉多纳

31/10/2011
文： 樂比堅尼

周二凌晨英超有獨腳戲，史篤城主場對紐卡素，今場形勢唔複雜，紐卡素異軍突起，至今九戰仍保不敗金身，直情有金鐘罩強勁氣勢無謂拗頸，難得受讓平半，樂比仔捧下盤。




（有線200及300台周二凌晨4時直播）




踢完九輪後，紐卡素竟力壓利物浦、阿仙奴等勁旅排第四，相信季前冇乜人會估到。樂比仔早前已分析過紐卡素優點所在，包括執靚咗條防線，丹巴巴亞、卡比耶、奧巴坦等法語系球員好使好用等，再補充係領隊柏杜好早已搵到球隊最佳陣式，所以季初陣容非常穩定，故較其他球隊早入局。另一個值得留意因素係球隊士氣極好，相當團結，當一支球隊能夠做到上下一心，真係非常難應付！


史篤城現疲態


當然，史篤城都係一支相當優秀球隊，佢哋主場曾令利物浦、曼聯及車路士吃盡苦頭，最終失分而回，但呢隊波最擅長係穩守突擊同埋死球戰術，對住強隊可大派用場，但對住同級對手反而未必有優勢。睇番佢哋上季主場成績，先後令車路士、阿仙奴、曼城及利物浦失分，但卻失分畀降班球隊黑池、韋斯咸及下游球隊韋根、西布朗，足以證明剛才論點。




史篤城今季另一隱憂係要兼顧歐洲賽，雖然上周中冇歐霸踢，但相繼於聯賽及聯賽盃不敵阿仙奴及利物浦連輸兩場，嚟緊周五凌晨又要喺歐霸作客以色列對特拉維夫馬卡比，領隊佩尼斯承認賽程太密，部分球員感到疲倦。紐卡素作為英超不敗之師，乘對手疲兵難起，仲要有得受讓，梗係買到佢斷為止啦！