簡單複雜化冇錯

猪拉多纳

　　人生如戲，五光十色，有起有跌，轉折位多，時而峰迴路轉，突然又會急轉直下。但如果冇上又冇落，一路平平淡淡咁，誠如周星馳先生話齋，同條咸魚冇分別！至於，正常人頂唔頂得住起起伏伏嘅刺激？駕唔駕馭得晒啲風浪？因人而異。

　　賽馬世界都似齣戲，有時馬迷只係觀眾，有時會擔綱演出，冇參與嘅場合，咪翹埋雙手齋睇。真金白銀掟落去，跑緊時直情代入埋騎師角色，喺電視旁又嗌又揮鞭！若閣下一個唔好彩，買條六環彩，叫胡叫到尾關，慘到影相跑第三，六寶六環一一擦柱，頓時把自己代入「白燕」角色，比淒涼家嫂更慘情。

　　另外，有陣時某啲賽事場合，就如三國演義古裝片，可惜我哋唔係做諸葛亮，而係變成司馬懿，面對1個空城，揮軍直搗定係收兵？真係諗爆頭！像剛周日有場賽事就有咁嘅feel，第四場出馬7件咁大把，仲唔係1拖368，一買就中啦！最後卻上演一幕虛則實之、實則虛之，爆出兩舊幾Q、兩千幾蚊T。當時唔係洪某悲觀，但喺賽前已經多次忍唔住口話馬少場合先驚，邊有簡單成咁，當然，自己捉唔到「怡勝」或「按得美麗」，唯一做到嘅咪唔「入城」囉！

馬會賽馬節目主持　洪禮賢