利華搞唔掂華倫

猪拉多纳

01/11/2011
文： 朱楓

歐聯E組出線關鍵戰，華倫西亞要晉級，今晚主場鬥利華古遜非勝不可，咁啱利華大將波歷克爆鼻要戴面具落場，狀態打折扣，朱楓睇好華倫可以報仇，捧1.55倍主W！（有線62及202周三凌晨3:45直播）


華倫非勝不可決心復仇


E組未開打前，好多人都認為車仔同華倫係出線大熱，不過華倫上仗作客輸畀利華1:2，依家落後利華4分，今場唔可以再有差池。雖然華倫目前喺E組未開齋，但其實3場波嘅表現都唔算太曳，主場仲逼和過車路士。早排好多人話華倫有中場簡拿利斯重傷，預計對隊波影響好大，不過睇番近況，華倫演出唔差，日前喺西甲主場3:1擊敗基達菲後，將不敗走勢增至3場，並升上西甲第4位，今場仲有正選門神迪亞高艾維斯同新進國腳左閘佐迪艾巴雙雙復任正選，相信係時候喺小組開齋。




利華日前喺德甲贏弗賴堡1:0，當中波歷克仲取得自06年5月後首個德甲入波，可惜佢喺比賽中被撞爆鼻，今晚要夾硬戴面具死頂（右圖），需知利華本身有巴尼達同連拿度奧古士圖兩大攻擊主力養傷，假如連「發電機」波歷克都「運作」得窒住窒住，利華又有乜能力反抗？作客華倫唔輸都難。