魯賓卡山凍僵熱刺

猪拉多纳

03/11/2011
文： 樂比堅尼

開始冬令時間後，大家睇波又要捱多一粒鐘，所以樂比仔特登揀來早場魯賓卡山對熱刺同大家分析。兩軍係Ａ組實力最強球隊，相信齊齊出線機會甚高，但目前魯賓卡山僅得四分排第三，如果想爭出線嘅話，今場一定要加多兩錢肉緊先得！




樂比仔睇好魯賓卡山嘅原因有三，首先俄羅斯冰天雪地，而且離西歐地區旅程遙遠，客軍面對種種不利因素，往往要花更大氣力，呢個亦係魯賓卡山近年喺歐洲賽揚威嘅原因。記得前屆歐聯，強如當屆冠軍國際米蘭及「地上最強」巴塞隆拿作客都贏唔到佢哋，就知魯賓卡山主場幾唔簡單。




第二係熱刺自從踢過歐聯後，對歐霸已經唔太重視，球隊最大目標係聯賽前四，爭取來季歐聯入場券，所以佢哋上次作客ＰＡＯＫ都派出大量後備，由於球隊已有七分在手，即使今仗輸波，以熱刺實力仍有機會取得出線權，故大有機會留力之後兩仗分組賽。


夏利列納留院冇隨軍


最後係熱刺領隊夏利列納留院接受治療，唔會隨隊作客，眾所周知佢係球隊精神領袖，佢唔在陣中隨時牽一髮動全身，魯賓卡山集多項有利因素於一身，主勝值得支持。