馬體會變陣狙擊烏甸

猪拉多纳

03/11/2011
文： 安高

憑一場勝仗終結黑色10月嘅西甲馬德里體育會，今晚喺歐霸盃I組主場迎擊意甲烏甸尼斯，肯定想食住道氣乘勝追擊。主帥文沙奴上仗變陣成功，搵嚟新星阿祖安盧比斯拍住法卡奧，前線即時生晒，要搞掂喺歐霸盃隨時玩留力嘅烏甸難度唔高，安高今場睇好1.5倍主勝！（有線61及201周五凌晨4:05直播）


大勝薩拉戈薩吐烏氣


話係黑色10月，其實馬體會嘅低潮早喺9月尾就開始，自從9月25日慘敗畀巴塞0:5之後，竟然連續7場未贏過，無論西甲定歐霸盃都搵唔到食，其中5場波更係連波都入唔到球。到上周末嘅西甲主場對薩拉戈薩，主帥文沙奴就大膽變陣出擊，星級球員雷恩斯被貶後備，改用西班牙U21阿祖安盧比斯擔正，結果佢同哥倫比亞射手法卡奧就合作無間，阿祖安盧比斯仲省夠2粒，協助球隊3:0贏波一吐烏氣。


烏甸歐霸盃半力出擊


事實上，以馬體會人腳嚟睇，西甲跌到落第10當然唔收貨，至於歐霸盃喺I組上輪作客烏甸又係贏形勢輸波淨吞2蛋，搞到目前只能緊隨烏甸排小組次席，今次返番主場，為報仇兼確保出線，肯定唔會留手。




另邊廂，烏甸今季表現令人喜出望外，喺意甲排第2，歐霸盃又位列小組第1，不過力奇睇過佢哋對上3場歐霸盃陣容，其實根本未盡全力，單係首席射手迪拿達利至今只踢過1場，上陣66分鐘，擺明唔多志在歐霸盃，排到榜首其實係靠主場威力同運氣。




再者，佢哋今季主客場演出分別極大，主場喺各項賽事夾埋踢7場就得6勝1和，客戰則係7戰1勝4和2負，勝率大幅度下跌，今晚佢哋又係作客出擊，睇怕都打定輸數。


橫數千軍


‧馬體會主場少失波

‧歷來主場6次鬥意大利球隊得3勝3負。

‧開季以來主場9戰得6勝3和，6場冇失波。

‧烏甸歐戰作客曳

‧歷來唯一作客西班牙以0:2不敵巴塞隆拿。

‧近6場歐洲賽作客波未嘗勝果。