鳳凰啄水手得個「細」

猪拉多纳

04/11/2011
文： KIT

各位《太陽報》讀者，如果你喺今日下晝先睇到我呢篇稿，就記得快啲撳去球彩台睇直播，因為新西蘭個時區行快澳洲幾粒鐘，所以平時好少睇到威靈頓鳳凰主場賽事，今日就特登早啲開廠，睇吓呢隻「鳳凰仔」點靠個「細」頂住水手！（有線64及204周五下午2:30直播）


澳職都踢咗成個月，「鳳凰仔」個主場威勢毫無起色，因為佢哋把握力實在太差！例如上兩場分別對珀斯光輝同墨爾本勝利，佢哋唔係無領先機會，只不過一而再、再而三將啲射門炒上看台，梗係失波失分。無計啦，成隊最入得嘅伊菲爾重養緊傷。

兩隊唔識入波

「鳳凰仔」重要小心控制住佢哋啲脾氣，過往3場波已經有4位球員做咗「紅牌阿姑」，本來已經唔係好夠人腳，今日後防薛蒙特重要停賽。班球員再咁停賽落去，「鳳凰」短時間內都好難再展翅高飛！所以今日點都會踢得保守啲，入唔到波都唔可以再輸多場！


「水手」上星期反勝珀斯光輝就係威係勢，但實情佢哋今季都無踢過邊幾腳好波，尤其是麥西蒙好似做咗透明人魔！條前線好似未瞓醒咁，今季自然走晒樣。


今日水手作客去到新西蘭，其實兩隊都係海軍鬥水兵，大家都無入球把握，就當然要入球細。仲有幾個奇怪數據：雙方過往12次對賽，只曾喺4年前試過一場係兩隊同時有入波！所以大家不妨吼埋雙方啲細嘅零字尾波膽。