數駒強配巫斯義 告東尼有大動作

猪拉多纳

　　練馬師告東尼，跑咗兩個月，贏咗10場頭馬，在9月份，贏親馬都係打單泡，不過，踏入10月，情況就唔同，曾經在兩期田戰（1/10、30/10）贏3W及起孖，可見經過1個月適應後，此廐攻勢不斷。而今期東廐出馬不少，大部分均有近績支持，其中有幾匹畀巫斯義跑，睇嚟今日一戰，呢對組合應該會有大動作。

　　今期佢畀咗好幾匹有近績支持嘅馬畀巫斯義跑，好似「好好機會」、「精彩生輝」及「勁闖駒」全部都係啱啱入Q之馬，成堆精英畀得巫斯義，睇嚟廐主有意連場搏殺。

　　「好好機會」呢匹質新馬，今季跑3場，冇W有Q，全數係1400米路程，能夠一再交出成績，除了路程性能之外，手上當然有虛分，由於目前仍在四班，分量自然十足。

　　而「精彩生輝」及「勁闖駒」，今季賽績冇前駒咁準，但一樣好好鬥志，「精彩生輝」今季轉到東廐，3場得亞季各一，上場縮回1200米有Q，輸畀大超班馬冇得講，但今仗對手不同，的確有勝算。「勁闖駒」重返直路賽，適應能力比谷草好好多，排在中外檔也有利，或令威力更大。　

Jack