車仔撻得番撞散布力般

猪拉多纳

05/11/2011
文： 樂比堅尼

今晚英超好戲連場，其中兩支「英超大盜」車路士及曼城分途作客布力般流浪及昆士柏流浪。車曼兩軍今季大盤率奇高，車仔十戰八口大已經好惡，曼城更「盜高一着」，十戰九口大，今晚分途遇弱，又係入球騷時候。




呢個世界大部分人都係跟紅頂白，一沉百踩，但作為理性投X者，絕唔可以盲目隨波逐流，反而應該喺大眾恐慌時候，趁機喺好價位入市。車路士法定時間四戰不勝，領隊保亞斯頓成為箭靶，但喺樂比仔眼中，幾場失利非世界末日，只會增加車仔反彈決心同動力，今晚作客布力般流浪，推介「讓球客勝」及大盤。




（有線202及302台周六晚11時直播）




首先分析吓車仔前四場未能贏波原因，先講作客輸畀昆士柏流浪○比一嗰場，車仔明顯受到球證不公平對待，打少兩個仍然有唔少入波機會，演出其實不俗，跟住聯賽盃對愛華頓，車仔派出大量後備出戰，最終加時擊敗愛華頓正規軍，成績絕對收貨。


遇豆腐防線勢反彈


上周聯賽不敵阿仙奴，確實係車仔近四仗表現最差，但阿仙奴確係復甦，車仔失準輸波可以理解，至於周中歐聯被亨克逼和，呢場車仔根本唔太在意，畢竟和波後佢哋仲排喺榜首，樂比仔唔係要為車仔失利搵藉口，只係認為車仔目前只屬「假低潮」，如果呢場對實力疲弱嘅布力般都踢唔番本身水平，先會再重新作出評估。




布力般今季聯賽僅贏過一場，樂比仔已多次提出領隊堅恩係罪魁禍首，呢隊波進攻固然冇重心，今時今日仲要靠耶高保衝鋒陷陣，防線亦相當得人驚，今季聯賽場場失波，只要車仔發揮到八成水準，相信要贏布力般兩粒綽綽有餘。