碧咸個人騷 炮製大團圓

猪拉多纳

06/11/2011
文： 樂比堅尼

美職季後賽明早上演東、西岸決賽。西岸決賽由洛杉磯銀河主場迎戰皇家鹽湖城。銀河今季超晒班，聯賽及盃賽主場十二連勝，加上碧咸今季約滿，來季極大機會返回歐洲落班，從稍後嘅總決賽早早安排喺銀河主場舉行，就知道善於計算嘅美國佬希望炮製煽情十足嘅大團圓結局，樂比仔認為主勝1.62倍抵玩。（now 633及660周一早上10時直播）


西岸決賽 銀河超班掃皇


提醒大家，兩場決賽都係一場過分勝負。碧咸○七年以2億5千萬美元同銀河簽約五年，一屆總冠軍都冇幫銀河攞過，但就外借到AC米蘭兩次，而且仲帶傷而回，搞到坐多過踢。樂比仔只能夠講句，碧咸實在欠銀河太多，如果今次唔還番個人情畀銀河，睇怕以後都冇機會，只能來生再報！




不過，樂比仔認為碧咸好大機會臨別前「標尾會」，因為銀河今季實力堪稱史上最強，當路雲同羅比堅尼喺美職絕對超晒班，況且今季係碧咸五年銀河生涯中最出色同落力嘅一季，全季貢獻多達15次助攻，幾乎係對上四季嘅總和（共16次），實在睇唔出其他對手有能力搶走銀河冠軍獎盃！


誓報○九年之辱


鹽湖城係○九年總冠軍，該屆總決賽就係以十二碼擊敗洛杉磯銀河，不過鹽湖城比起兩年前實力差咗好多，而且離開佢哋嘅高原球場，鹽湖城嘅發揮可謂相差好遠。睇番佢哋作客嘅成績，近五次僅一和四負，當中包括上周中西岸準決賽次回合作客不敵西雅圖海灣者○比二，今場作客銀河都幾難偷到雞！