皇馬玩殘散沙

猪拉多纳

06/11/2011
文： 走肖

皇家馬德里今晚喺西甲主場對奧沙辛拿，屬於巴拿貝球場史上首次「早場」賽事，為咗攻陷亞洲市場當然唔衰得，特別係日前C朗喺歐聯連省兩粒，加盟後平均每場入0.95球，成為「皇馬史上最強金靴」，有佢入波「-2」照捧「讓球主勝」，對家傷兵多變「散沙」等劏。（now632及660台周日晚7:00直播）


金靴C朗弗到漏


無論你認唔認同C朗「靚仔、有錢、好波」，佢入球效率恐怖係改變唔到嘅事實。經過連續2場冇入球、冇助攻後，C朗喺歐聯發威連入里昂兩球，加盟皇馬後入球數字突破100大關，過去105次上陣入100球，平均每場入0.95球，包括上季西甲有40球進帳，令佢開賽前有機會喺馬德里第2次領取歐洲金靴獎。




現時C朗已超越普斯卡斯平均每場入0.90球紀錄，成為「銀河艦隊」史上入球效率最高射手，今季佢上陣16場，更加攻入14球、交出8次助攻，即使有人覺得佢鍾意玩對手，都唔可以否認佢係「皇馬最強」，就算中場卡卡、後衞法比奧干查奧同中堅卡維奴養傷，都好難阻到C朗向破紀錄個人第3個金靴獎進發。


奧沙辛拿傷兵多


今場皇馬要贏得好睇吸納亞洲球迷，奧沙辛拿就成為祭品，由於佢哋傷兵滿營，前鋒艾華路施祖度又要停賽，據講呢場得16個一隊成員可以隨隊，加上開季前放走射手彭迪安尼、前鋒艾蘭達同中場卡梅拿斯後，依家嘅情況同「散沙」冇分別，近7場聯賽有2勝4和1負，唔代表可以頂得住皇馬強力炮火。


橫數千軍


皇家馬德里




9連勝少失波

‧過去33次主場對奧沙辛拿有26勝5和2負。

‧連盃賽9連勝，並連續5場保持不失。

奧沙辛拿

訪巴拿貝腳軟

‧今季作客得3和2負，入4球、失14球。

‧近5次作客皇馬全敗。