同感後追贏得

猪拉多纳

　　谷草A欄跑馬，仲以為易刨啲，點知近日天氣唔穩定，執筆之時啲雨冇停過，除非今日忽然有變，唔係嘅話，場地點會正常。一旦場地偏慢，馬場隨時大放冷氣。另外，柏寶連孭幾鑊，堂堂二哥冇理由咁失威，我估有機會喺今晚成功反底，咪過分睇淡佢啲馬！

　　第一場五班2200米。「朗天」上場改戰大長途田草2000米，贏來不費力，二馬「綠駿群英」已經出晒名喺低班好好後勁，末段都唔係佢嗰皮，除了彼此跑法關係，證明加程令威力大增。今仗再跑長200米，有好無壞，而之前喺谷草已有晒作戰經驗，亦跑得好好哋，細場兼大長途，效果可能仲好過上場，一於博冧莊。

　　第二場四班1200米。「清脆利落」早排腳有事，退出過比賽，隔3日復課，之後唔係就住做嘢，影響應該輕微。雖則至今仍是處子之身，做二奶次數多，但亦係有一份穩定性存在，撞啱今場對手各無把握，水準太參差，以佢能力，隨時可混水摸魚。

　　第四場四班1200米。「同感」係咪谷草性能份外好？真係有懷疑，但上場切切實實喺呢程入Q，初次角逐只係輸短頭，演出好掂，而阿棟認為或因上賽跑法略帶被動，反而仲啱隻馬性能。如果上場係測試性質，今仗沿用的話，那段後勁喺直路必可盡情發揮，最終場地偏慢，影響幾大係未知之數，但亦可能幫到，樂觀啲啦。

點買法

　　今晚由於天雨關係，玩馬心情係會有影響，亦唔建議「出手闊綽」，都係打吓水片就算，要搏命都唔係搵呢類場合啦！脆脆哋買兩匹馬W過關2x3算嘞，「朗天」射「同感」，希望當「老行」。

資深評馬人　陳華棟