葡U21食魚腩摩爾多瓦

猪拉多纳

10/11/2011
文： 朱楓

葡萄牙大國腳近排成績一般，踢唔踢到下年歐國盃決賽周仍然係未知數，其實細果嗰班都係！目前喺U21歐國盃外圍賽第6組出線形勢都麻麻，今晚主場出擊，誓必大炒魚腩摩爾多瓦U21搶番主動權，讓2球照要1.65倍「讓球主勝」！（有線155周五清晨5:00直播）

首循環作客贏2:0

葡萄牙U21早排成績都唔錯，贏過德國同法國兩大勁旅，但近況就有啲濕滯，繼主場被波蘭逼和後，上輪作客仲要輸畀俄羅斯，目前喺U21歐國盃外圍賽第6組3戰僅得4分排第3位，比第2位嘅波蘭少3分，好彩比對手少打1場，假如想搶番出線主動權，今晚面對住魚腩摩爾多瓦可以話非勝不可。


其實葡萄牙U21本身人腳唔錯，好多仲外流西甲同英超，當中今季由愛華頓外借葡超塞圖巴爾嘅前鋒祖奧施華近況超弗，已取得3個葡超士哥，對住摩爾多瓦隨時Show time，畢竟呢支魚腩之前3場分組賽全敗勁失12球。首循環主場對葡萄牙都輸0:2，今晚換轉作客，仲可以有咩期望？