奇趣賽事打孖上

猪拉多纳

　　剛周中賽事，唔係因為爆冷關係，就覺得奇趣，而係陣中形勢嘅變化，以及部分馬匹嘅表現，跑完都唔多明白，要解釋就更難，而嗰兩場係當晚第七及八場中長途賽事。

　　好似第七場三班一哩，頭三段快標準時間幾線，咁嘅情況下，會利晒沿途在後嘅後上馬，冇錯！多駒俱在直路大幅改善名次，如轉直路彎仲喺尾嘅「靚到爆」、「家傳碧玉」、「威仔皇」等，不過，睇番末段造咩時間，原來只係25.13秒，乃季內26場谷中一哩賽事，暫時最慢拉士嘅一場！

　　剛戰第七場末段超慢

　　就算第七場賽事喺好黏地上進行，最後一段段速慢成咁，真係好少見，理論上，咩馬都有能力贏到，只要直路跑快些少。所以，呢場末段追得好嗰批馬，係咪真正有衝勢，要好小心去秤。

　　喺尾場1800米，奇趣味道更濃，先喺出閘冇耐，部分騎師慢半拍，冇充分去搶位。而跑至第3段，拖慢至26.62秒，其時喺後列嘅，亦冇乜邊個騎師意識到要開始改善位置，最終一對擺前走嘅「俊鬥仕」及「開心老友」一Q返！我唔覺得同場部分馬，係因為唔識跑黏地，以致影響表現，反而，主因會係部分騎師沿路嘅位置感不足及遲疑，亦因此，今場前幾名嘅水準，又係要好心水清咁計算。

馬會賽馬節目主持　洪禮賢