智利半力撼烏拉圭

猪拉多纳

11/11/2011

智利作客烏拉圭嘅世界盃外圍賽前發生「兵變」，五名智利成員包括主力維達爾，懶理禁令大開派對，翌日操練全部缺操，最終全部被革扯！領隊保格希事後話好失望，表示此舉雖會嚴重影響球隊實力，但「犯規五小強」實在太離譜，趕走佢哋係唯一選擇。聽朝智利要作客強敵烏拉圭，形勢好險峻。


（周六早上6時開賽）


五個球員包括祖雲達斯中場維達爾同西布朗後防大將干沙路查拉，另外佐治華迪維亞（彭美拉斯）、包爾斯亞（伯明翰）同卡路士卡莫拿（阿特蘭大），全部都係球隊主力。周二晚上，球隊實施宵禁，但當晚「五小強」為慶祝佐治華迪維亞個小朋友受洗，所以就犯禁偷走出去開派對。到翌日操練時，佢哋飲到啤啤夫全部起唔到身，保帥等咗四十五分鐘都唔見人，就走去酒店房搵佢哋，見到五隻「死豬」仲瞓緊，當然火都嚟埋，最後決定將五人趕扯。

時間緊迫只召土炮補缺

保帥講起擰晒頭：「我真係好失望，但佢哋要咁唔自愛我都冇計，為咗維護紀律，我惟有踢五人出隊。」因為時間緊迫，保帥冇辦法徵召海外兵，只有喺國內搵球員替補，球隊實力士氣都受到打擊。