奇兵愛沙尼亞受讓筍

猪拉多纳

11/11/2011

2000年嘅斯洛文尼亞、04年嘅拉脫維亞，近屆不乏冷嘢殺入歐國盃決賽周，照目前情況睇，今屆愛沙尼亞極有可能成為另一支奇兵！愛沙尼亞嚟到附加賽可以話係超額完成，冇嘢好輸實踢得更放，主場鬥鋒力受損嘅愛爾蘭有望偷雞，受讓平半要1.99倍下盤。


（now633台周六凌晨3:45直播）

愛爾蘭羅比堅尼受傷

人口得嗰130萬左右嘅愛沙尼亞，喺分組賽先後砌低過塞爾維亞、斯洛文尼亞同北愛，證明嚟到附加賽唔係符碌，就連領隊魯治利都話輸波係正常，絕對唔會死守咁冇出息，實行同對手鬥攻。愛爾蘭呢邊有沙恩朗受傷退隊，奇雲杜里要停賽，羅比堅尼亦係負傷入選缺席咗賽前操練，似乎讓唔起愛沙尼亞喎！