海外兵團遊多哈 巴西Hea鬥埃及

猪拉多纳

14/11/2011
文： 樂比堅尼

今日馬會得兩場賽事受注，場面冷清，最矚目當然係巴西對埃及，賽事於中立場卡塔爾的多哈舉行。巴西今次點兵缺少多名大牌球星，球員踢來亦唔多起勁，上周對非洲加蓬雖贏二比○，但演出完全欠缺森巴足球嘅風範，今仗對非洲霸王埃及，巴西更難佔到甜頭，樂比仔建議捧細盤同「讓球客勝」。




（周二凌晨1時開賽）




由於巴甲進行得如火如荼，今次巴西國家隊清一色選海外球員，海外球員嘅心態同本土球員好唔同，呢班大帝歎慣食慣，平時搭飛機多過踢波，踢呢類應酬性質嘅熱身賽，好難攞個心出嚟同你搏命，尤其係巴西上周遠赴「不毛之地」加蓬，搞到班球員個個牙痛咁聲，依家又要飛去中東約戰另一支非洲隊埃及，敷衍了事係人之常情。


捧細盤同「讓球客勝」


事實上，巴西今次陣容欠缺咗多位巨星壓陣，好似以往中前線擔大旗嘅朗拿甸奴、柏圖、羅賓奴、尼馬、拉美利斯及甘素一概欠奉，僅得波圖前鋒侯克較具睇頭，反而防線頗為齊腳，盧斯奧、大衞雷斯、丹尼爾及堤亞高施華均在陣，所以呢隊巴西可以話守強攻弱，埃及要入佢哋唔易，但巴西要入波亦有難度，故最好就係揀細盤。




埃及係非洲國家盃奪標次數最多球隊，如果話佢哋係非洲一哥絕不為過，雖然佢哋近年冇乜大牌球星湧現，僅穆罕默德施丹及艾穆罕默迪較具名氣，但卻係非洲最有隊形嘅球隊，因為埃及聯賽搞得有聲有色，球員大多留喺國內搵食，所以國際賽嘅準備亦比其他非洲國家好，今場難得有機會對巴西，肯定搏晒老命，吼埋「讓球客勝」。