谷草新勝馬翌仗多艱辛 蔡廐兩駒呢鋪金？

猪拉多纳

　　蔡約翰目前贏了14場頭馬，與沈集成並列練馬師榜首，而在上周三賽事，此廐終於有馬匹識得連捷，就係「夢幻魔術」。其實，之前贏完跑得好仲有唔少馬，如「多采多姿」、「名馬」、「XX繽紛」，統統贏完之後仲有Ｐ，總算唔係「一招了」。

　　唔係阿Jack吹毛求疵，亦唔係對蔡神仙要求特別嚴厲，但堂堂大馬房，做咗多屆冠軍，點都對佢有一定期望，問心講，目前頭馬唔係少，不過，暫時呢個馬房打叠贏嘅比例唔多啱數。講開打叠贏，今晚蔡廐有兩駒新勝谷草，仲要又跑贏馬原班路程，「點石成金」角逐第七場三班1200米，「安穩」跑尾場三班1800米。筆者唔知大家對呢兩匹馬有咩睇法，但如果要追多鋪W，我唔敢話唔得，不過真係幾艱難。

　　就當我苦口婆心，查過蔡廐上季至此，一共贏過十幾場谷草，而該批新勝馬再出為數11駒，冇1隻可連捷已經「生靈塗炭」，原來跑P都係得1隻！咁呢兩匹馬今晚命運如何？我又唔係貼死火馬，唔使下定論，但如果兩駒之中，硬係要執1隻再買，「點石成金」應該係較有機會破到數據。　

Jack