幸運多寶唔簡單

猪拉多纳

        谷草C+3欄C+6彎上演賽事，對排好位、跑法主動之賽駒有利，只要看看對上兩期16場賽果，1至3檔馬可交出8W，就知有幾犀利，基本上好有天然優勢，唔可以拗頸，而阿棟雖然年紀唔細，亦唔會作無謂嘅堅持，一於順應形勢，揀重心，都係睇住一批內檔馬。
        
        第一場四班1000米。「幸運多寶」三落四班即有唔同表現，咪睇佢上賽只係跑第四名，輸成個幾身位畀今次又同場「樂有贏」，感覺上，水準普普通通，但有兩點要留意清楚，其一，上賽前段明顯比正常快咗，佢跟喺二三位點會唔吃力，返到直路唔斷算叻；其二，上場喺出閘及速度方面，的確比前進步，可見落班係有好大競爭力。今仗有埋1檔幫手，只要早段跟得暢順，有望出頭。
        
        第六場三班1200米。「佳同」啱啱大熱門死火，衰喺出閘反應差，早段已經讓賽，而中段又喺馬林勒避及搶口，窒礙了發揮，所以，跑得唔好，我當睇唔到。呢次換人及除配件再戰，有晒部署，如果佢出閘利落，呢場又唔係冇得追，以佢嘅後勁，一條直路掃晒啦！
        
        第八場一班1000米。「大把在手」跨季好多場俱入前四名，睇佢唔起又入嚟，以為差唔多分盡，結果佢又喺三甲，呢類馬有heart，陣上跑出十一成水準，真係吹佢唔脹！雖然此程冇1200米咁正宗，穩健性大於一切，負磅唔重而排位唔差，畀佢早段咬到好位，有力進佔三甲。
        
點買法      
        
        頭場「幸運多寶」，上場一跑得近，呢次隔晚即捧成大熱門，明顯係信心飛，所以，上述3駒之中，博W先揀佢。而重心QT場次鎖定第六場，「佳同」做膽，腳拖幾匹中內檔馬３５６７。