新力飛夢幻十一洪福齊來堅旺財 傾力之城甜將歡呼星一言為定

猪拉多纳

　　4場國際賽今日上演，餘下6場俱為三班或以上，講到戲碼，差唔多係一季之中最強。

　　
　　每年至此，總會想到香港隊守得住邊隻盃，嚟到今屆亦唔例外，睇吓係坐一望二，定係贏到三關嘞。

重心場次　第2場　第三班（80-60分）1200米

　　「新力飛」季內跑3場，冇1場發揮得到，輸完又輸與實力無關。等到今仗肯跑田草1200米，之前認為佢暑後有進嘅睇法有冇錯，呢場會找到真相。

　　「堅旺財」唔係14檔，其實會更有信心，以佢上場輸畀「帝豪駿駒」賽績，三班實夠贏。「洪福齊來」及「夢幻十一」，之前同程一Q返，在此仍具資格入圍。「首飾達寶」如冇進步，唔易再上。

　　「勁力」上場失望，轉倉日子短，不易變身。「幸運雄威」2檔及跑法進取，喺今場或賺到形勢。「快樂無窮」連搏兩場，要視乎體力回唔回到籠。

第1場　第三班（80-60分） 1600米

　　「威老虎」外地贏此程係採用中置跑法，所以，上場增程跑唔出水準，主因係出閘後被撞咗落後列，打亂了整套發揮，與性能及狀態無關。今仗再跑長200米有好冇壞，希望1檔可令佢早段咬住好位，發揮會唔同。

　　「雨電風雷」唔係驚冇兩劑（歷年未試過），點可能唔揀。「精奇」上賽蝕多咗至贏唔到，不過，輸少少畀「紅山茶」已經好叻，再跟。「非常精」如非再遇到上賽咁差形勢（早段望空焗住早走），幾有冠軍相。「太陽海岸」如果之前缺課影響唔大，換人及加程其實係好事。

第3場　第一班（115-95分） 1400米

　　「傾力之城」及「甜將」，剛於上賽埋Q，前駒造出季內1400米最快時間，夠晒說服力，而後駒末段力追同樣吸引，兩駒在此場仍是呼聲高。

　　「歡呼星」唔係塞車，上場唔會不入前列，再畀機會。「一言為定」有級數唔怕縮程，係擔心之前腳傷問題，不過，早排大閘試得真係唔錯。「多采多姿」要再進步，至有本事喺一班贏，若不，只會係三三四四。

第4場　國際一級賽（3歲及以上） 2400米

　　「鑄鐘大師」與「始創先鋒」，此程有晒根據，級數可能前駒略為秤先，後駒未出過國，亦可能蝕啲。

　　墨盃冠亞軍「多利得」和「紅色禮物」，唔擔心由3200米縮回2400米，因兩駒往績已證明過。如再揀，會在「自由好」和「威達馬」之間選擇，尤其後駒，可博其有進步。

第5場　國際一級賽（3歲及以上） 1200米

　　「小橋流水」及「XX繽紛」，近況出色，更重要係排檔較主要對手理想，跑得出預賽水平，有機會再埋Q。

　　「火箭人」和「蓮華生輝」，不幸排了大外檔，唔會冇影響。「讚惑」要好大進步，先至有可能跑得比上賽更叻。「真機伶」礙於守好位跑法，排外檔或削弱機會，如內檔應該拖埋。

第6場　第三班（80-60分）1400米

　　「高一線」上賽前已指出，如非曾缺課，信心大好多，結果一樣贏得易（締速比同日一班只慢一線多），質地搭夠，當然，轉馬房概念亦係成因。唔係一招了，負重仍具贏面。

　　「超群名駒」略失望，暫時不會再抱有希望。「滿地金」立心落班，呢場可能見識到改善內閃毛病後嘅真正威力。「自由萬歲」與「沙場王子」，近績準，正路腳。「香檳歲月」唔明點解上場咁差，有疑問。

第7場　國際一級賽（3歲及以上） 1600米

　　「軍事攻略」唔多滿意上場發揮，不過，大賽當前，又換番主帥，應該唔會再出現老襯處理手法，係港隊希望所在。

　　「占美大亨」叻在轉歲後仍有進步，如直路大家鬥爆，未必輸畀前駒。一對雌馬「莎貝寶駒」及「夏威夷鳥」，前駒上屆唔係沿路外叠冇遮擋，可能更有威脅，但亦反映喺此賽係主角之一；後駒貴為日本馬后，加上賽績準，唔可以睇小。大冷門留意上屆跑過又接近嘅「驪勝名駒」。

第8場　國際一級賽（3歲及以上）2000米

　　「雄心威龍」啱啱嗰場點輸，大家心中有數，只能怪形勢使然。如果今場正常發揮，大可補中。「加州萬里」騎者唔夠老練，令到上場出彎後兩度被阻，只要今場直路唔再塞車，佢嗰段後勁唔講得笑。

　　「天鷹翱翔」以英國冠軍錦標盟主身份參戰，級數夠有凸。「諺語」又係另一有資格突圍嘅外隊馬。

第9場　第二班（100-80分） 1200米

　　「皇帝法令」唔易再贏，評分漸摸頂，可取在跑法夠機動，以及演出冇乜大起大落。「牛精大師」加磅後唔易再捷，同埋，上場形勢實在太遷就了！今場能夠跑得到P已本事。

　　「花月佳期」進度未足以贏晒，不過，本身係夠好速度嗰類馬。「奇葩」如果上賽氣管多血冇太大後遺，仍有機會入圍。「禮尚往來」進度冇預期咁快。

第10場　第二班（100-80分） 1600米

　　「陽明飛飛」未甩過頭兩名，或者有排未到盡頭，當然，仍在二班真係冇壓力。「何方神聖」傷愈復出跑得好，熱身後應續進步。

　　「皇龍戰駒」4檔預咗又似上賽賺跑法。「伽羅」排到好位，發揮點會似得上場咁蝕，咪灰心住。

　　「自由港」8檔又可能似上賽沿路外叠，充其量跑位置。「智多飛」冇預期進步幅度咁大。

馬會賽馬節目主持　　洪禮賢