精英勇士檔利破蛋

猪拉多纳

　　谷草呢條魔鬼跑道，向來唔易忖度，你以為當晚有利追趕，點知成晚都係前置跑法着數，完全同賽前諗嘅係兩碼子嘅事。所以，阿棟一向唔會喺谷草買得大，玩吓就無妨。至於揀馬大方向，其實別無他法，先「掃瞄」一批內檔馬，有啱心水嘅就會率先考慮。

　　第四場第四班1200米。「精英勇士」恨贏恨到發燒，跨季跑咗十幾廿場，最佳名次係四至六名，搏極未贏，主因係馬匹實力問題，唔關騎練方面。而今場又跑同一路程，本來唔係好睇得佢起，但排在B欄2檔，以及減5磅優惠，頓時令條件比前理想。如果唔係搏到攰，繼續跑到本身水準，要贏取在港第1W，唔係冇可能。

　　第六場第三班1000米。「先鞭直前」唔知咩事會隔得耐至復課，可能係腳患，要就住就住。不過，無論上賽或上季贏馬水準，真係幾犀利，去季可壓倒「芙蓉威龍」，上賽則在不利跑線之下，跑贏直路賽專家「勁闖駒」，單計此兩場頭馬，足以在二班爭勝有餘 ！ 倘遲復課影響唔係太大，可期再捷。

　　第七場第三班1650米。「一團威」係正宗一哩好手，至今維持到5成上名率。而季內跑了3場，雖然未贏到，但冇1場會輸得遠，就連唔上名嗰場，輸畀頭馬只個幾身位，證明今季一直具備狀態。呢場有1檔之利，賽事形勢唔應該會比上賽差，如果巫斯義做啱留放，以佢嘅級數，有機會反先「勁飛揚」，贏埋唔覺意外。

點買法

　　谷草B欄賽事擔心場地偏差，又唔係特別好心水，所以，只係建議捧「精英勇士」1W2P算嘞。而重心QT場次亦揀第四場，揸２膽，腳拖幾匹內檔馬如３７９　１２。

資深評馬人　陳華棟