吳定強緊貼團隊福星

猪拉多纳

　　昨朝眾華人馬房埋頭苦幹練兵，似有出擊手影。吳定強動態甚為緊張，戰馬出試前例必見其在旁監督，其中「團隊福星」由賴維銘策騎往機坪沙圈踱步時，他一直在欄邊睇到實，人馬步出隧道口時，又見其再三向鞍上人叮囑，課後練者再踏單車跟隨人馬回廐房，馬匹操練前後皆不離其視線範圍，非吼實不可。

　　列陣第一場的「團隊福星」，上仗易配楊明綸，早段跟得較慣常為前，但末段猶有餘力，雖敗也不過以以個多身位跑第五，表現及格有餘，今次重配贏馬拍檔賴維銘，晨課仍見狀態大勇，排得二檔好位形勢有利，不難重溫好夢。

　　今季伍碧權已經贏了十五場頭馬，提早達標但攻勢未停，今次又有幾匹實力馬出戰，如「天外之天」及「勁飛揚」等當起之馬，有機會在新年贏馬。另外，「速度快」及「鼓浪春風」兩匹質新馬昨課由黎海榮及杜利萊考驗走勢均有進步，練者亦跟到實，動靜唔嘢小。　

韋柏